KAMPAL DI MENUA DIRI EMPU – pengawa BN

Nya meh upah kitai Iban dadak ditipu buban enggau bala konco ia.

Netap aba tanah mesai tikai

Tusur tebing sungai laban umbak ekspres nganjak ari ai, ladang nganjak ari atas. Rumah panjai mengingir-inggir di tebing sungai ngentap tanah ke mesai tikai. Dia meh bala kitai Iban ngenduh ngantika diburu BN. Semua tanah asal aki-ini diempu ladang….orang ti enda temu penatai.

Au, tanah nuan ko nuan, laban sida ke nasau-mulau, nebang-berumpang kelia munya endang aki-ini nuan. Atur tuai rumah, pengulu pemancha pen pia mega nunda tusun tunggu kitai Iban. Sida enda bisi kuasa ngatur lebuh ke ngaduka laya indu-nembiak maia ke belaia ke antara.

Tanah enggi nuan meh ko nuan?

Anang ngambu wai, laban nitihka leka jaku Land Code / Undang2 tanah Sarawak, enti tanah nya nadai pala, lalu nama dia ukai enggi nuan, anang ngambu ngapa. Ukai enggi nuan tanah nya! Barang bisi nama dia nya meh empu ia…china, laut, buban kini.

Gambar ke di ambi ari bilun satelite di langit enda ngelala temuda, pengerang, pulau galau tauka madang engkabang, madang rian, madang engkeranji enda ngelala tanah NCR nuan. Ia enga ngelala lebas antara kampung puang tauke temuda serta menua. Uji abas ngagai upis Land Survey di menua kita, tanah sapa ke endor kita ngentak ke rumah panjai kita nya enti ukai tanah perintah.

Kampal magang di gaga perintah BN

Nya meh ungkup kitai Iban, kitai Dayak di Sarawak sekumbang 46 taun ke udah. Kitai nadai ngerara pangan diri sama-sama endang KAMPAL magang di menua diri empu. Pagila lusa semua kitai endang diburu mindah. Nadai agi utai ke ditan ka kitai di menua.

RM250 seikar ke diterima kita semina bayar tungkus asi…sagu ati ngambi ka kita badu ngelaban company ladang / perintah. Nyampau nya rega pengelelak aki-ini kitai kelia? Nama jaku anak-uchu, ichit-wit kita ila, 20 taun, 50 taun, 100 taun ila lebuh sida bekenang ke pengawa kita diatu ke nyual menua enggau rega RM250 seikar?

Enti majak bakatu, badas agi beradu…pagila lusa pen kita ka diburu. Kini kita rari?

Bala China bisi nengeri…tanah bisi OT. Bala Laut pintar ngidupka diri.

Kitai Iban, kitai Dayak nama penyadi?

Atur sapa ti bansa tu enti ukai atur BN ..buah Merdeka?

Agi ga kitai rindu ngundi BN? Sida YB enggau menteri kitai Iban / Dayak enda berani bejaku, buban bekuasa penuh atas tanah kitai. Berani agi YB China baka sida Wong Ho Leng bejaku ke kitai Dayak. Amat purih Apai Saloi meh kitai lalu bedau nemu pendiau diri dikeruk-kebuk orang di mata, diperut. Ni parti Dayak ke amat ngeringka Dayak / Iban?

Anang nganu bala YB laban sida pen takuk ka buban! Enggai ga nyadi enda ngenang perut diri empu. “Semina BN tau mai pemansang. Penyakal semina tau bejaku aja” pia ko sida endang nunda jaku “Politik Pemansang” buban.

Pemansang di beri BN dalam 46 taun

Pemansang…atap sing, tangki ai, sagu ati rugi ketegal bah? Nyampau nya ungkup kitai 46 taun ke udah? Endang amat nya meh jalai buban ngumpan kitai, ambi kitai enda jauh nyepal…ditibarka tulang enggau tisik ngambika kitai enda keberuran.

Enti keberuran kitai nyadi mangah, tang enti chukup kenyang tau kering ngelaban BN. Bakanya mega bala YB kitai, anang enda sinu ka sida…enda idup enti nadai buban.

Undi kitai baru ga bala sida nya ila?

Bala PKR, DAP enda paloi serta chukup nemu tanggung jawab enda tau enda muai BN lalu nirika perintah baru. Semina perintah baru tau mai penemu serta adat baru kena ngemansang ke menua Sarawak. Semua ke leju dikeduan buban aram pilih bala calon PR laban nadai agi orang berani nukar BN megai menua. Ia ke udah ngelebus awakka lepas, ke bedau kitai awak ka PR megai menua. Undi meh Keadilan, DAP, PAS tauka SNAP sekali tu!

Bala enembiak ke chukup umur, register meh jadi pengundi diatu.

Anang ngayahka undi kita. Nya meh kuasa kita kena muai buban, muai BN di Sarawak.

Change WE Must

3 Responses to “KAMPAL DI MENUA DIRI EMPU – pengawa BN”

1. KEMPAT TIANG on October 19th, 2009 4:19 pm

   Enti nemu diri ngampal ba menoa diri..
   Pangkah aja PKR nya….
   Meda gaya ia…ngemaioh ni ia ulih ngubah menoa kitai…..

   TAU GA UJI…NADAI SALAH…SAMA-SAMA KITAI BERATI.

2. bhsyyqg on October 21st, 2009 9:04 am

   KAMPAL??? KAMPAR….

   ASI BUBUL??? ASI BUBUR….

   JAKO??? JAKU….

3. BUJANG TATAU on October 21st, 2009 1:02 pm

   KAMPAL tauka KAMPAR?

   Ukai ka “spelling” leka jaku pen mandang ka berapa jauh kitai tinggal dibanding ka enggau bansa bukai di Malaysia tu? Ukai ka DEWAN BAHASA & PUSTKAKA udah ngalah ka Borneo Literature Bureau?

   Minta ampun unggal, laban ke enda pas spelling jaku Iban. Nadai subject jaku Iban maia kami sekula kelia, unggal. Patut meh bala kita ke nemu agi, tulung bansa kitai ngambi ka badu diketawa ka urang.

   Alam randau tu, aku minta uji sebut utai ke baguna agi, baka pala tanah NCR, saham alam kompeni ladang, pengawa alam upis perintah, anembiak kitai dayak di universiti awam, adat asal enggau pengarap, 18 Point Agreement Sarawak alam Malaysia serta maioh agi utai bukai ke patut ditemu kitai. Nya utai ke patut disebut kitai.

   Betalat ka leka jaku lak ka bala indu-nembiak, au kaban? Umbas meh ngasuh urang bukai rangkai ngeli ketawa ka pemeli bansa kitai.

   Enti PKR bangat enda nemu ngaduka kitai bansa alam 5 taun ti ka datai, BN baru ga ila. Nyamai menua demokrasi. Raja baru enda ulih tikar.

Leave a Reply